Weiterbildung für Mitarbeiter kleiner Museen und Heimatstuben Poradźena dźěłarnička 28.11.24 w Stróži

Zarjadowanje započinaše so z wopytom w šulskim muzeju K.A. Kocor. Wobdźělnikam da so wobšěrny a zajimał dohlad do dźěławosće muzeja. Knjeni Marlis Konjechtec předstaji nazornje,  kak so w muzeju stawizny kubłanja na wsy, wosebje młodym wopytowarjam, sposrědkuja.

Po tym předstajištej Jadwiga Bryckec a Sonja Hrjehorjowa w “Domje tysac hatow” wuslědki SWOT analyzy, kotruž stej wot pózdnjeho nalěća we wšelakich zarjadnišćach přewjedłoj. W rozmołwach ze sobudźěłaćerjemi małych muzejow jewi so stajnje zaso trěbnosć dalekubłanjow a prawidłownych dźěłarničkow. Tak je bjez dźiwa, zo so na prěnim zetkanju muzejownikow tež  tajke poskići. Po zhromadnym wobjedźe předstaji knjez Sven Vogt, koordinator dźěłoweje skupiny  Łužiska muzejowa krajina, informatiwny přednošk na temu „Zběranje a so zběranja wzdawanje“. Při tym rysowachu so wšelake wuchadźišća a strategije, kotrež maja za dźěło w muzejach wulki wuznam. Wosebje wuzběhnyć ma so trěbnosć wuzrawjeneje koncepcije tež za mały muzej.

Dalši wažny aspekt zarjadowanja bě diskusija wo dwurěčnosći w muzejach. Wobdźěleni rozjimachu, kak hodźa so wjacerěčne poskitki efektiwnje zwoprawdźić, zo bychu šěrši publikum narěčeli, ale tež zo bychu so muzeje na serbske rěčne rumy wuwiwali.

Dźakujemy so wšitkim wobdźělenym za jich angažement a čiłe diskusije. Wosebity dźak słuša knjezej Svenej Vogtej za jeho inspirěrowacy přednošk. Wjeselimy so na přichodne zarjadowanja a dalšu wuměnu znutřka muzejoweje komunity.