Region wokoło Rakec
Region um Königswartha
Motiwatorka za serbsku rěč
Raphaela Wićazowa | Lehmann
Region wokoło Rakec
Indiwiduelne skutkowanje motiwatora w swojej kónčinje je po mojim měnjenju jara wažne. Kóžda kónčina, haj samo kóžda gmejna ma swój wěsty staw, štož aktiwne serbske žiwjenje nastupa. Jako motiwatorka skutkuju w gmejnach Rakecy, Njeswačidło, Radwor, Wulka Dubrawa, Bóšicy a Hodźij.
Wo mojim dźěle
Über meine Arbeit
Serbšćinu praktisce zeznać a nałožować
Kónčina, w kotrejž skutkuju, je dosć wulka. Saha wot Wulkeje Dubrawy hač do Rakec a Hodźija. Do kóždeje gmejny spytam so najprjedy „zažiwić” a rozhladuju so za ludźimi, kotřiž so za serbskosć zajimuja resp. kiž so hižo za to angažuja. Syć mojich kontaktow je mjeztym chětro rozrostła. Wosebity format, kotryž za trenowanje rěče poskićuju, je „Serbska kuchnja”. Zhromadnje warjo a pječo serbujemy. Tute wotputane wašnje wabi dorosćenych, kotřiž serbšćinu hišće wuknu. Wosebje rjenje je, zo maćernorěčni a wuknjacy Serbja w našej kuchni zhromadnje w horncach měšeja. Tute zarjadowanje poskićuju prawidłownje popołdnju abo wječor. Intensiwnišo, mjenujcy wjacore dny, budu zajimcy serbšćinu bórze w druhim formaće dožiwjeć a nałožować móc. Planuju pućowanja resp. kolesowanje po našej rjanej Łužicy. Wažne dźě je, zo su naše poskitki po wobsahu wabjace a načasne. Potom wobdźělnicy z čim wjetšim wjeselom serbuja.
ke kontaktejProjektowe wjerški
Projekthighlights
Serbska kuchnja za swójby "pječemy z truskalcami"
Serbska kuchnja za swójby „Pječemy z truskalcami” 05.06. w Radworskim dwórnišću
Njedawno zetka so cyłkownje 14 dorosćenych a dźěći k zhromadnym warjenju a serbowanju na Radworskim dwórnišću. Rěčna motiwatorka Raphaela Wićazowa běše k woblubowanym zarjadowanju „Serbska kuchnja za swójby” přeprosyła. Tutón raz steješe woblubowana truskalca w srjedźišću. Wšitcy zhromadnje napjećechu sej słódny nakid z truskalcami a posypkom. Přidatnje přihotowachu sej dźěći a dorosćeni truskalcowu limonadu a plincy z ćerstwymi truskalcami. Při zhromadnym serbowanju dachu sej wšitcy chłóšćenki zesłodźeć. Rjane to zaso serbske popołdnjo, kotrež wosebje tež wuknjacy a noworěčnicy lubić dachu.
Serbska kuchnja: „pječemy kmótřiske całty“
Rěčna motiwatorka Raphaela Wićazowa je sej w martrownym tydźenju do Hodźija, Delnjeho Wujězda a Wulkich Zdźarow dojěła, zo by zajimowanym serbski nałožk zbližiła a zhromadnje kmótřiske całty napjekła.
Darjenje kmótřiskeje całty je wosebje w katolskich kónčinach Łužicy hišće starodawny nałožk, kotrež so hač do dźensnišeho na zelenym štwórtku praktikuje. Kmótřa darja swojim mótkam čerstwu całty, pokrytu z cokorowej glazuru abo makom. Rěčna motiwatorka Raphaela Wićazowa je sej w martrownym tydźenju do Hodźija, Delnjeho Wujězda a Wulkich Zdźarow dojěła, zo by zajimowanym tutón serbski nałožk zbližiła a zhromadnje kmótřiske całty napjekła. Při zhromadnym tołkanju ćěsta, plećenju wopušow a wuformowanju tajkeje całty je wobdźělnikam tež serbsku rěč, na přikład wšitke pomjenowanja přidawkow a gratow, zbližiła. Kreatiwne wašnje nawuknjenja serbskeje rěče a wosebje tež serbskich nałožkow so wšitkim wobdźělnikam jara spodobaše. Cyłkownje je so na tři zarjadowanjach wokoło 40 ludźi wobdźěliło.
Swójbna schadźowanka w Radworju
Póstnisku njedźelu witaše Rěčny centrum WITAJ zhromadnje z projektom ZARI na mjeztym 14. Swójbnu schadźowanku do Radworskeje sportownje SLAVIJA.
Póstnisku njedźelu witaše Rěčny centrum WITAJ zhromadnje z projektom ZARI na mjeztym 14. Swójbnu schadźowanku do Radworskeje sportownje SLAVIJA. Pisany program na wšelakich stacijach podpěrachu Radworske towarstwa, kaž na přikład Staršiska iniciatiwa z projektom Serbski ExperiMINT-campus, sportowe towarstwo SV Radwor 1922 a Radworska młodźina. Serbsku rěč słyšeć, zeznać a dožiwić steješe w srjedźišću popołdnja. Tole wužichu někak 250 wopytowarjow wosebje z Radworja, Budyšina a wokolnych wsow. Zahajenski program wuhotowachu Radworskej skupinje „Łužičanki“ a Radworska dźěćizna zhromadnje z Nowej Dobu. Po witanju wjednicy RCW Beaty Brězanoweje a zamołwiteho projekta ZARI za rěčne kubłanje Juliana Nyče zabawjachu so dźěći ze wšelakimi poskitkami, kaž na přikład clownowej šulu, sportom, medijowej pedagogiku studija LUCIJA, paslenjom a dalšimi. Rezimej rěčneje motiwatorki za kónčinu wokoło Radworja běše přewšo pozitiwny: „Tule widźimy kak žiwa, načasna a kreatiwna serbšćina je – tež za wšitkich, kotřiž chcedźa ju nawuknyć.”
„Serbska kuchnja – póstniske pječwa“ 26.2.25 na Radworskim dwórnišću
So w serbšćinje wukmanić a při tym słódne pampuchi pjec, to dožiwichu 13 wobdźělnikow na zarjadowanju „Serbska kuchnja – póstniske pječwa“ w Radworju.
Z wulkim wjeselom přihotowachu sej dźěći a dorosćeni zhromadnje z rěčnej motiwatorku Raphaelu Wićazowej słódne pampuchi a amerikanery. Nimo zhromadneho přihotowanje steješe pak intensiwna wuměnja a nawuknjenje nowych serbskich słowow w srjedźišću. Při tym sej wobdźělnicy rady pomhachu. Na kóncu sydaše połny taler słódnych čerstwych pječwow, kotryž dachu sej wšitcy zhromadnje zesłodźeć.
Kontakt
Kontakt
Raphaela Wićazowa | Lehmann
motiwatorka za serbsku rěč wokoło Wulkeje Dubrawy, Radworja, Rakec, Njeswačidła, Bóšic a Hodźija
raphaela.wicazowa@domowina.de
035935 169970
Raphaela Wićazowa | Lehmann
motiwatorka za serbsku rěč wokoło Wulkeje Dubrawy, Radworja, Rakec, Njeswačidła, Bóšic a Hodźija
Štó sym?
Rěkam Raphaela Wićazowa, sym 42 lět stara a bydlu ze swojim mužom a třomi dźěćimi w Radworju.
Što je moja motiwacija za dźěło jako rěčna motiwatorka?
Sym rodźena Radworčanka a so hižo lěta dołho za serbske žiwjenje w tutej kónčinje angažuju. Z tym mam hižo dobre kontakty k najwšelakorišim cyłkam kołowokoło Radworja.
Kajke nazhonjenja mam?
Sym hižo dlěje hač 16 lět w projektnym dźěle aktiwna. Tež čestnohamsce so hižo wjele lět w kónčinje angažuju, mjez druhim sym sobustawka Radworskeje staršiskeje initiatiwy, čłonka chóra „Meja” a zasadźuju so za zdźerženje Radworskeho dwórnišća.
Što we wólnym času rady činju?
Rady so w přirodźe zhromadnje ze swojim psom wuchodźuju. Zajimuju so za zela a rostliny našeje kónčiny. Wězo rady warju, wosebje z čerstwymi wudźěłkami z našeje wokoliny.