Hajenje tradicijow, kultury, wuměłstwa a aktiwity w towarstwach su mosćiki a wažne kótwišća za rewitalizaciju serbskeje rěče.
Zaměr wobłuka „kultura a towarstwa“ je natwarić syć regionalneje kultury, wuměłstwa a čestnohamtskeho angažementa, kotraž wuměłske a kreatiwne tworjenje lajkow spěchuje a wusko z wotpowědnymi institucijemi a profesionelnymi wuměłcami hromadźe dźěła.
Karta zwobraznja, hdźe je serbska rěč wšudźe zakótwjena, hdźe so ze serbskej kulturu abo wuměłstwom zaběraja, hdźe móžeš wo stawiznach regiona zhonić abo hdźe so nałožki a tradicije pěstuja.
Karta njeje hišće dospołna a so po času wudospołni. Zaměr je čestnohamtskich ze wšelakich wobłukow mjez sobu zwjazać.
Jeli zwěsćiš, zo smy kótwišćo zabyli, přizjew so rady pola nas! Chcemy kartu zhromadnje z tobu wudospołnjeć.
Die Karte zeigt, wo die sorbische Sprache überall verankert ist, wo man sich mit der sorbischen Kultur und Kunst beschäftigt, wo man etwas über die Geschichte der Region erfahren kann oder wo Traditionen gepflegt werden.
Die Karte erhebt nicht den Anspruch, vollständig zu sein. Sie soll dazu beitragen Ehrenamtliche aus unterschiedlichen Bereichen miteinander zu vernetzen.
Falls du bemerkst, dass wir einen Ankerpunkt vergessen haben, melde dich gerne bei uns. Wir vervollständigen die Karte gern mit deiner Hilfe.
• dźěłaja we wobłukach muzeje a domizniske stwy, hudźba a reje, literatura, dźiwadło a film, ludowe wuměłstwo, rjemjesło a drasta, sport.
• su wosebje čestnohamtsce skutkowacym towarstwam, skupinam, wuměłcam atd. po boku.
• analyzuja potrjebu.
• wudźěłaja a sposrědkuja materialije a přiručki za lajkow.
• podpěruja lajkow z fachowej wědu, organizuja a přewjeduja dalekubłanja.
• pletu syće mjez čestnohamtskimi akterami.
• skrućeja styki do serbskich zarjadnišćow.
• arbeiten in den Bereichen: Museen und Heimatstuben, Musik und Tanz, Literatur, Theater und Film, Volkskunst, Handwerk und Kleidung sowie Sport.
• stehen besonders ehrenamtlichen Vereinen, Gruppen, Künstlern usw. zur Seite.
• analysieren Bedürfnisse.
• erarbeiten und vermitteln Materialien und Handbücher für Laien.
• unterstützen Laien mit Fachwissen, organisieren und führen Weiterbildungen durch.
• flechten Netzwerke zwischen ehrenamtlichen Akteuren.
• stärken Beziehungen zu sorbischen Einrichtungen.
Sonja Hrjehorjowa | Rehor
nawodnica kulturneho wobłuka
sonja.hrjehorjowa@domowina.de
03571 6084614
Sonja Hrjehorjowa | Rehor
nawodnica kulturneho wobłuka
Štó sym?
Rěkam Sonja Hrjehorjowa, sym mać pjeć dorosćenych dźěći a bydlu w swojej ródnej wjesce, w Sulšecach pola Kulowa.
Što je moja motiwacija za dźěło w projekće? Chcu sobu na tym dźěłać,
Kajke powołanske nazhonjenja mam?
Sym kulturne wědomosće a sorabistiku studowała. Po studiju sym w Serbskej kulturnej informaciji prěnje powołanske nazhonjenja zběrała. Wot 2016 dźěłach pola Domowiny jako regionalna rěčnica abo projektna managerka.
Što we wólnym času rady činju?
Rady hraju lajske dźiwadło a dźěłam za Kulowske towarstwo Bratrowstwo, wušiwam a šiju.
Jadwiga Bryckec | Brützke
datowa managerka / kulturna posrědnica
jadwiga.bryckec@domowina.de
03591 3163853
Jadwiga Bryckec | Brützke
datowa managerka / kulturna posrědnica
Štó sym?
Rěkam Jadwiga Bryckec. Pochadźam ze wsy, w kotrejž so hižo we wšědnym žiwjenju njeserbuje – z Kubšic. Nětko bydlu w Zhorjelcu. Po abiturje studowach nabožinske wědomosće a filozofiju, doniž njejsym so na studij medicinskeje techniki podała, kotryž sym z masterom zakónčiła.
Što je moja motiwacija za dźěło jako datowa managerka/kulturna posrědnica?
Chcu rumy za serbsku rěč tworić a wosebje wokolinu podpěrować, w kotrejž so hižo njeserbuje. Tole chcu z kulturnymi poskitkami zwjazać.
Kajke powołanske nazhonjenja mam?
W firmje SKAN sym jako projektna managerka za izolatory dźěłała. SKAN je mašinotwarske předewzaće, kotrež zhotowja graty a izolatory za aseptisku produkciju.
Što we wólnym času rady činju?
Hladam rady sciencefictionowe serije abo pućuju po Limasu blisko Zhorjelca.
Što su moje nadawki na dźěle?
Hłowna intencija mojeho dźěła je, zajimcam za serbsku kulturu a rěč přistup a přehlad wo našich mnohich poskitkach wolóžić. Za to katalogizuju na přikład serbske kótwišća, kaž muzeje a kulturne cyłki (, rejowanske skupiny) a kubłanske srjedźišća, kotrež chcemy kartografisce na internetnej stronje zwobraznić.
Dale sym zamołwita za datowu banku našich wobdźělnikow mnohich kursow, kotrež naši rěčni motiwatorojo poskićuja.
Fabian Kola
posrědnik kultury za wobłuk sport
Štó sym?
Ja sym Fabian Kola a bydlu w Chrósćicach. Tam wopytach Serbsku zakładnu šulu a přeńdźech po tym na Serbski gymnazij w Budyšinje. Sport hraje w mojim wšědnym dnju wažnu rólu. Wot dźěćatstwa sym aktiwny čłon SJ Chrósćicy.
Što je moja motiwacija za dźěło w projekće?
Sport njeje jenož ćělne napinanje, ale tež wosebity rěčny rum. Komunikacija zwjazuje ludźi a je w kóždym nastupanju rozsudny faktor. Naša serbska rěč posrědkuje nam sylne začuće zhromadnosće a wolóža zdobom zrozumjenje druhich słowjanskich rěčow, štož móže na kóždy pad lěpšina być.
Kajke powołanske nazhonjenja mam?
Po šuli sym wukubłanje na drobnowikowanskeho překupca zakónčił a dźěłach po tym we wukubłanskim zawodźe, prjedy hač so tutomu nowemu nadawkej stajich.
Što we wólnym času rady činju?
Připódla angažuju so w našim młodźinskim klubje. Tam hrajemy prawidłownje dart a kicker abo w lěću tež raz wolejbul. Wosebje w zymskim času zetkawam so rady z přećelemi na karty placanje kaž škot abo dwójna hłójčka. Hdyž trjebam tróšku měra, wobhladam sej tež rady nowe serije. Hdyž kónc tydźenja raz sam aktiwnje njehraju, wopytam rady koparske hry we wokolinje abo sćěhuju profijowe hry w telewiziji abo hdys a hdys tež w stadionje.
Yana Humenna
kulturna posrědnica za wobłuk dźiwadło, film a literatura
yana.humenna@domowina.de
03591 3163857
Yana Humenna
kulturna posrědnica za wobłuk dźiwadło, film a literatura
Štó sym?
Rěkam Yana Humenna a sym Ukrainjanka. Wot měrca 2022 bydlu ze swojimaj dźěsćomaj a sotrowču w Budyšinje. Sym wukubłana rejowarka a choreografka, ale tež performerka, awtorka a dramaturgowka. Nětko sym kulturna posrědnica w projekće ZARI a zamołwita za dźiwadło, literaturu a film.
Kajke powołanske nazhonjenja mam?
W Kyjiwje běchmój z mužom natwariłoj swójske dźiwadło PostPlayLab. Sceniske čitanja načasneje dramatiki, zmužite eksperimenty režiserkow, nowe hłosy młodych dramaturgow, interdisciplinarne projekty, pytanje za nowymi formami a woznamami – wšo to a hišće wo wjele wjace je publikum na jewišću naju dźiwadła dožiwił.
Wuměłsce sym dźěłała w interdisciplinarnych projektach, kotrež so wusměrjeja na kulturne kubłanje, socialny angažement, na dźěło z wulnerabelnymi skupinami, kaž tež na mjezynarodne wuměłske dźěło. Jako wuměłča so wobstajnje z ludźimi zetkawam a wuměnjam.
Wot apryla 2022 dźěłach w sociodźiwadłowym centrumje „Thespis“ w Budyšinje. Sym dźiwadłowe hry za dźeći a dorosćenych pisała, wšelake interkulturelne projekty a performancy sobu přewjedła.
Při Němsko-Serbskim ludowym dźiwadle sym so prěni raz ze serbskej kulturu zeznajomiła a so do njeje zalubowała.
Što je moja motiwacija za dźěło w projekće?
Chcu rady sobu pomhać, zo so serbska rěč a kultura dale wuwiwatej.
Mam za njemóžne, zo wosrjedź Europy słowjanski lud ćišć němskeje towaršnosće začuwa, hdyž swoju identitu pokazuje, z tym zo swoju maćeršćinu w zjawnosći wužiwa abo swoju narodnu drastu nosy.
Wjeselu so jara, dale wšědnje serbsce rěčeć a swoje kmanosće při dźěle rozšěrjeć směć.
Što we wólnym času rady činju?
W swobodnym času rady na zahrodźe dźěłam, čitam knihi a moluju.
Štwórtk popołdnju, 26.februara 2026 je 6 žonow přeprošenju ZARI-wobłuk kultura sćěhowało , zo bychu sebi wot Bernadetty Čornakoweje z Konjec pokazać dali, kak so paćerje za družku abo małe paćerje za Wojerowsku drastu tykaja.
Tak stej na přikład pěstowarce z pěstowarnje na Horach paćerje za pěstowarnju tykałoj. Tež Carola Holdtowa ze Spal je hižo dawno njesćerpnje na składnosć čakała, zo by jej něchtó pokazał, kak so paćerje tykaja. Rady chce za dźowku nowe natykać.
Tež hdyž su paćerki za Wojerowske paćerje tróšku wjetše hač te za sačk katolskeje drasty, njejsu wězo 3 hodźiny koncentrowaneho dźěła dosahali, zo bychu paćerje hotowe byłe. Wšako maš sebi techniku najprjedy wobhladać, so wuspytać a tež tu a tam hišće raz natykany spočatk rozpróć, doniž by so skónčnje radźił.
Ale njehladajo na to běchu wšitcy jara spokojni a so hižo jara na dalši zhromadny termin za dwaj tydźenjej 12.03.2026 wjesela.
