Jadwiga Brězanowa I Bresan
docentka za rěčne kubłanje
Štó sym?
Sym Jadwiga Brězanowa a wotrosćech jako druhe wot 5 dźěći w serbskej swójbje w Smječkecach. Za studij stawiznow a sorabistiki podach do po abiturje do Lipska. Po studiju nawróćich so zaso do Łužicy a skutkowach tu wjele lět jako wučerka na serbskich wyšich a zakładnych šulach.
Što je moja motiwacija za dźěło w projekće?
Ze swojimi dołholětnymi nazhonjenjemi jako serbska wučerka skići so mi tu móžnosć, intensiwne kursy za dorosćenych sobu wudźěłać, přewjesć a sobu na tym dźěłać, hornjoserbsku rěč rewitalizować. Wjeselu so jara na nowe wužadanje, dorosćenym našu maćernu rěč nawučić, wjeselo při wužiwanju tuteje we wšědnym dnju zbudźić a jim tež našu kulturu zbližić.
Zhromadnje móžemy k tomu přinošować, tute drohotne kulturne herbstwo zdźeržeć a za přichodne generacije zachować.
Kajke powołanske nazhonjenja mam?
Wjele lět sposrědkowach z wjele lubosću dźěćom a młodostnym našu maćernu rěč, kulturu kaž tež serbske stawizny a dźěłach mjez druhim sobu na zwoprawdźenju koncepta 2plus* a wuwiću serbskorěčneho wuknjenskeho materiala.
* 2plus je šulske typy přesahowacy pedagogiski koncept za serbsko-němske šule w Sakskej za zažne přiswojenje wjacerěčnosće.
Što we wólnym času rady činju?
W swojim swobodnym času rady pućuju, sej swět a cuze rěče wotkryju. Přewšo rady pak zetkam so z přećelemi a swójbnymi k zhromadnemu hudźenju a spěwanju, tak kaž sym to hižo jako dźěćo doma na swójbnych swjedźenjach dožiwić směła.
03591 3163858
jadwiga.brezanowa@domowina.de
