sobota, 1.6.24
Dźensa dawaja wodźenja w “šuli 1900 ”, w času wot 14-18 hodź. Ale tež serbski bajowy swět móže so we wjesnej stwě sobu dožiwić. A wjesne kino je wotewrěło a pokaza hodźinsce mały film.

póndźela 3.6.24
Dźensa so we wjesnej stwě rapaki modelěruja a to wot 10-11 hodź. a wot 15-16 hodź. Pohladajće tež raz we wjesnym kinje nutř, wot 10-16 hodź. so hodźinsce małe filmy pokazaja.

wutora 4.6.24
Na tutej rjanej wutorje móžeće we wjesnej šuli a wjesnej stwě wjele wo bookii-pisaku zhonić a jón wuspytać. Wjesne kino ma wot 11-13 hodź. hodźinsce mały film za Was.

srjedu, 5.6.24
Dźensa so póndźelu zhotowjene rapaki namoluja. Za to podajće so prošu do wjesneje stwy, tam je wšitko za pomolowanje přihotowane a to wot 10-11 hodź. a wot 15-16 hodź.

štwórtk, 6.6.24
Dźensa přeprošamy Was zaso wjesnu šulu wopytać, tam móžeće so na wodźenjach wobdźělić, w času wot 12-16 hodź. wjele wo šuli wokoło 1900 zhonić.
Serbski powěsćowy swět předstaja so we wjesnej stwě wot Juliany, čitamy, molujemy a tež něšto k słuchanju tam dawa. K tomu widźiće tež zajimawe filmy we wjesnym kinje, hodźinsce wot 11-14 hodź.
We wjesnej šuli móžeće dźensa kurs serbšćiny wopytać, rěč zeznać a z wjesnym šulskim wučerjom zajimawe rozmołwy wjesć a to wot 10-16 hodź.

pjatk, 7.6.24
Dźensa je we wjesnej stwě jutrowny čas wudyrił. Po serbskich motiwach so jejka debja a namoluja a to wot 10-12 hodź. a wot 14-16 hodź. Ale pohladajće tola tež raz we wjesnej šuli nimo, njeje drje wodźenjow ale pomocliwych wujasnjenjow a přewod při Wašich prašenjach.
We wjesnej šuli móžeće dźensa kurs serbšćiny wopytać, rěč zeznać a z wjesnym šulskim wučerjom zajimawe rozmołwy wjesć a to wot 10-16 hodź.

sobotu, 8.6.24
We wjesnej stwě je dźensa zaso jutrowny čas a Wy směće jutrowne jejka debić z Mariju. W času wot 10-12 hodź. a 14-16 hodź. steji Wam pomocliwje poboku. A jeli hišće šulu wokoło 1900 njeznajeće, potom dźiće tola raz do wjesneje šule, tam je wjele wučbnych materialijow a wustajenskich předmjetow.

póndźelu, 10.6.24
Wjesna šula přeprošuje dźensa zaso; wot 10-15 hodź. wotměwaja so hodźinsce wodźenja a pokazuja nam drohotne šulske stawizny šulskeje stwy Ptačecy a Stróže pola Malešec.
Serbske chłóšćenki móžeće sami přihotować z Rafaelu. Wot 10-14 hodź. dawa z njej zhotowjenje zeloweje butry a ma tež zelowy memory za Was. Frank pokaza we wjesnym kinje zajimawe serbske filmy a to hodźinsce wot 11-15 hodź.

wutoru, 11.6.24
We wjesnej stwě so dźensa rapaki modelěruja a to wot 10-11 hodź. a wot 15-16 hodź. Ale tež swět serbskich bajow móžeš we wjesnej šuli wot 10-12 a wot 14-16 hodź. dožiwić.

srjedu, 12.6.24
Dźensa stanje so wjesna stwa zaso z kuchnju ze zelami a dawa zelowu butru. Dajće so wjesć wot Rafaele. Wjesna šula poskića dźensa tež rěčne kupanje z bookii-pisakom. Wuspytajće to raz!

štwórtk, 13.6.24
Dźensa směće we wjesnej stwě rapaki namolować. Wjeselimy so na Was wot 10-11 hodź. a wot 15-16 hodź. Wjesna šula wjedźe Was zaso přez muzej šule w 1900 a to hodźinsce wot 10-14 hodź.
We wjesnej šuli móžeće dźensa kurs serbšćiny wopytać, rěč zeznać a z wjesnym šulskim wučerjom zajimawe rozmołwy wjesć a to wot 10-16 hodź.
Štóž chce dźensa hišće raz serbske jutrowne jejka debić, tón chce so prošu we wjesnej stwě nutř dóstać. Wot 10-12 hodź. abo wot 14-16 hodź. móžeće wjele wo tutym serbskim ludowym wuměłstwje wuknyć. Runočasnje podawa naše serbske wjesne kino hodźinsce předstajenja, to rěka dohlady do serbskeho filmowstwa a to wot 10-12 hodź. a wot 14-16 hodź.
We wjesnej šuli móžeće dźensa kurs serbšćiny wopytać, rěč zeznać a z wjesnym šulskim wučerjom zajimawe rozmołwy wjesć a to wot 10-16 hodź.

sobotu, 15.6.24
Dźensa pokazamy zaso we wjesnym kinje serbske filmy a to hodźinsce wot 11-14 hodź.
We wjesnej stwě móžeće dźensa drohotne ludowe wuměłstwo dožiwić a sej modelěrowanje wobhladać. Serbska drastowa skulptura so modelěruje wot Marje Šołćic.
We wjesnej šuli móžeće z bookii-pisakom pola Luciana rěčne kupanje ze serbšćinu dožiwić a to wot 11-14 hodź.

Tu widźiće cyły program, kotryž so wotměwaše w běhu 12 dnjow we Łužiskim centerje we Wojerecach. W ramiku Šajatovicowych dnjow tam fungowaše serbska wjeska. Dwaj domizniskej muzejej a šulskej stwě so na tym wobdźělichu a my 5 motiwatorojo so wo wšo starachmy. Činjachmy tam kontakty z publikumom, rěčachmy wo wjacerěčnosći, přibližichmy serbsku kulturu z mnohimi poskitkami a publikum bě zahorjeny. Něhdźe 10 zajimcow wob dźeń z nami diskutowachu, sej rjanu šulsku stwu “1900” z modernej Bookii-technologiju wobhladachu. Z tym bě cil, mjenujcy serbšćinu a serbsku identitu přibližić nowemu měštej Wojerecy, do skutka stajeny. Management Łužiskeho centera bě zahorjeny a knj. Matschke mysli na to, tole wospjetować. W mojej režiji bě wšě planowanje, někotre kreatiwne poskitki a organizacija w kooperaciji ze šulskej stwu Ptačecy a Stróže. Poskitki, kotrež sej za to wumyslich, su dołhodobne a so za dalše skutkowanje we mojej kónčinje jara derje hodźa, hladajo na mytologiju wokoło Krabata a rjaneje Wojerowskeje narodneje drasty, kotraž nas dźens pohonjuje k wožiwjenju serbšćiny w tutej kónčiny.

Přez wjace hač 40 lět njebě serbšćina w Ptačecach prezentna a nětko wabješe so za kurs serbšćiny, ale raz hinak. Běchmy jenož třo, ale hibićiwje tute 3 žony, maćerje a wowki zeznachu serbske knihi a Bookii-pisak. Wobhladachu sej tutón repertoire, wuspytachu pisak a słuchatka, doniž njezapočachmy z jednorymi flosklemi. Mějachu hišće dopomnjenki na serbske postrowy a jednore wobroty. Tak so wo tute dale starachmy a na kóncu smědźeše kóžda Bookii-pisak a wupytanu knihu na dwaj tydźenjej sobu domoj wzać. Tak so doma tež wnučki natyknu a na hrajkace wašnje ze serbskej rěču do kontakta přińdu. Wosebje so mi lubješe jich plan sej tute knihi wuměnić w běhu přichodnych 14 dnjach, prjedy hač so zaso zetkamy a dale na serbšćinje dźěłamy.