Za 9 měsacow serbsce rěčeć!

Ty chceš so z dźělom serbskorěčneje zhromadnosće stać, njejsy pak hač dotal składnosć abo chwile měł/a, našu rěč zaměrnje nawuknyć? Hač je twoja motiwacija za nawuknjenje serbšćiny priwatna abo powołanska, z našim intensiwnym programom DOMOJ skićimy ći móžnosć, w běhu dźewjeć měsacow – wot apryla do decembra 2026 – wšědnje serbšćinu dožiwjeć, rěčeć a wuknyć, zo by ju na kóncu programa nałožować a samostatnje dale skrućić móhł/a.

Za kóždy lětnik mamy 12 městnow w našim „rěčnym hnězdźe“ we Wulkich Zdźarach – wužij tutu jónkrótnu šansu! Zajimcy za přichodny lětnik móža so kóždy čas pola nas přizjewić. Wšitke informacije namakaš dale deleka.

In 9 Monaten Sorbisch sprechen!

Du willst ein Teil der sorbischen Sprachgemeinschaft werden, hast aber bislang keine Gelegenheit oder Zeit gehabt, unsere Sprache zielgerichtet zu erlernen? Ob deine Motivation zum Sorbisch-Lernen privat oder beruflich ist, mit unserem Intensivprogramm DOMOJ bieten wir dir die Möglichkeit, im Lauf von neun Monaten – von April bis Dezember 2026 – täglich Sorbisch zu erleben, sprechen und lernen, um es am Ende des Programms selbst anwenden und selbstständig weiter stärken zu können.

In jedem Jahrgang haben wir 12 Plätze in unserem „Sprachnest“ in Wulke Zdźary/Groß Särchen – nutze diese einzigartige Chance! Interessenten für den nächsten Jahrgang können sich jederzeit bei uns melden. Alle Informationen findest du weiter unten.

Što je DOMOJ? Was ist DOMOJ?

DOMOJ je program syće ZARI, kotryž zmóžnja Łužičankam a Łužičanam, do našeje serbskeje rěče intensiwnje so zanurić a ju w běhu dźewjeć měsacow tak nawuknyć, zo bychu ju wšědny dźeń nałožować móhli – na přikład w swójbje, na dźěle abo ze susodami a přećelkami.

Ty chceš serbšćinu nawuknyć, my trjebamy nowych rěčnikow – mamy potajkim samsny cil! Za to smy wutworili „rěčne hnězdo“ jako škitany rum we Wulkich Zdźarach, mjez Budyšinom a Wojerecami, hdźež maš idealne wuměnjenja za nawuknjenje serbšćiny. Z inowatiwnymi metodami, wulětami, serbskim praktikumom a dźěłom na swójskim serbskim projekće stanješ so z dźělom serbskeho swěta.

Zo by so w běhu programa cyle na serbšćinu koncentrować móhł/a, poskićimy tebi stipendij, kotryž ma wupadnjene dochody w tutym času zdźěla narunać.

Kak móžu so požadać? Wie kann ich mich bewerben?

Chceš-li so za přichodny lětnik programa DOMOJ požadać a wot apryla do decembra 2026 intensiwnje serbsce wuknyć, dyrbiš jenož někotre wuměnjenja spjelnić:

* bydliš w Budyskim abo Zhorjelskim wokrjesu abo w Drježdźanach
* sy znajmjeńša 20 lět a maš powołanske wotzamknjenje abo sy runje we wukubłanju/studiju
* maš kruty plan, w přichodźe sam/a serbsce rěčeć, čitać a pisać móc

Za požadanje trjebamy slědowace wěcy wot tebje:

* krótki žiwjenjoběh
* wupjelnjeny naprašnik z krótkim motiwaciskim spisom a projektowej ideju (hlej tu)
* dopokaz wo kwalifikowacym powołanskim wotzamknjenju, jeli maš

Požadanje za lětnik 2026 móžeš hišće hač do 9.11.2025 digitalnje zapodać pod zari (at) domowina.de.

Kak wotběži program DOMOJ? Wie läuft das DOMOJ-Programm ab?

přihot

hač do 9.11.2025: zapodaće požadanjow
17.–21.11.2025: rozmołwy z požadarjemi
26.11.2025: rozsud wo zestajenju skupiny
28.11.2025: prěnje zetkanje z wobdźělnikami
09.–12.02.2026: intensiwny kurs za wobdźělnikow bjez předznajomosćow

wotběh programa

13.04.2026: start programa w „rěčnym hnězdźe“ we Wulkich Zdźarach
18.07.–09.08.2026: lěćne prózdniny (z nadawkami)
09/2026: třitydźenski praktikum w serbskej dźěłowej wokolinje
12/2026: zakónčace pruwowanje
18.12.2026: kónc programa (wotchadnička)

W połnym modusu wobdźěliš so wot póndźele do štwórtka na městnje w rěčnym hnězdźe a dźěłaš pjaty dźeń indiwiduelnje abo w małej skupinje wot doma. Druhdy budźe pjatk tež zhromadny wulět. Wobdźělnikam w połnym modusu skićimy móžnosć stipendija. Wysokosć stipendija orientuje so po wosobinskich wuměnjenjach pak na minimalnej mzdźě abo na najwyšej sadźbje BAföG.

Za ludźi, kotřiž w serbskorěčnej wokolinje dźěłaja, wobsteji nimo toho móžnosć podźělneho wobdźělenja (wot póndźele do srjedy). W tutym padźe pak njemóžeš so wo stipendij požadać.

Typiski dźeń w rěčnym hnězdźe – jeli njejsmy po puću na ekskursiji abo mamy hosći – wupada takle:

08:45 přijězd
09:00 aktiwizowanje, rěčne hry, wuhódnoćenje nadawkow etc.
10:30 rěčna wučba I
12:00 wobjedowa přestawka
12:45 zwučowanja
13:15 rěčna wučba II (w skupinach)
14:45 kultura/stawizny/přednošk
15:30 swjatok

Prašenja?

Jeli maš prašenja wo wotběhu a wuměnjenjach programa DOMOJ abo wo stipendiju, tak wobroć so na nas! Hač do bórze, wjeselimy so na tebje!

Julian Nyča

nawoda rěčneho kubłanja

julian.nyca@domowina.de
03591 3163852

ke kontaktej

Julian Nyča

nawoda rěčneho kubłanja

Štó sym?
Sym Julian Nyča, rodźeny Budyšan a přeswědčeny dwurěčny Łužičan ze serbsko-ewangelskimi korjenjemi. Maćeršćinu swojeho dźěda sym hakle jako młodostny započał znowa wuknyć. Mjeztym mam sam swójbu, w kotrejž jenož serbujemy. Studował sym slawistiku a kulturne wědomosće na Humboldtowej uniwersiće w Berlinje.

Što je moja motiwacija za dźěło w projekće?
Projekt ZARI koncentruje so na wožiwjenje serbšćiny w kónčinach, hdźež so wona tuchwilu z historiskich přičin tak husto njenałožuje. Jedna z tutych kónčin bě domizna mojich serbskich prjedownikow. Tuž mam hižo ze swójbnych stawiznow sem wulku motiwaciju, serbšćinu tam zaso zadomić, hdźež bě wona hišće před mało generacijemi wobstatk wšědneho dnja. Jako noworěčnik chcu wuměnjenja stworić, zo bychu sej tež druzy našu rěč tak lochko a zabawnje kaž móžno zaso přiswojili.

Kajke powołanske nazhonjenja mam?
Studij wotzamknywši běch štyri lěta sobudźěłaćer projekta “sotra”, kotryž je prěni serbsko-němski awtomatiski přełožowar wuwił a wozjewił. Připódla hižo wjacore lěta započatkarjam serbšćinu podawam, a to we wšelakich skupinach na wjeskach tak tež digitalnje. Nimo toho zaběram so ze wšelakimi digitalnymi serbskimi projektami, kaž ze serbskej geografiskej online-kartu, serbskej Wikipediju abo přełožuju webstrony a aplikacije.

Što we wólnym času rady činju?
Přewšo rady pućuju, hač po łužiskej domiznje abo we wukraju, wosebje po wuchodnej a juhowuchodnej Europje. Najzajimawše su mi při tym regiony z bohatym a mnohostronskim kulturnym a rěčnym herbstwom. Čestnohamtsce so hižo połdra lětdźesatka w Budyskim Kamjentnym domje angažuju. Wot 2014 do 2023 běch čłon rady Załožby za serbski lud a wot 2019 skutkuju w Radźe za serbske naležnosće Sakskeje.

03591 3163852
julian.nyca@domowina.de