Akciski plan za hornjoserbšćinu předstajili
Rewitalizacija hornjoserbšćiny njeje jenož cil projekta ZARI a serbskeho třěšneho zwjazka Domowiny, ale so nadźijomnje tež ze zaměrom cyłeje Łužicy stanje. Naša ambicija je, 100 000 serbsce rěčacych hač do lěta 2100 zdobyć. Mjezycil – kotryž to docpěć zmóžni – je, receptiwnu dwurěčnosć we Łužicy rozšěrić. Chcemy, zo změje 50 000 Łužičanow w lěće 2050 pasiwne znajomosće serbšćiny.
Wažne je, zo přiwza kóžda kónčina we Łužicy tutu wiziju 100 000 serbsce rěčacych. Wěmy, zo je centralna kónčina za rěčanu serbšćinu dźensa třiróžk mjez Budyšinom, Kamjencom a Wojerecami. Jenož so na nju koncentrować pak njedosaha, zo bychmy cil docpěli. Zo by serbšćina přichodnje dale žiwa była, mamy nowych rěčnikow zdobyć a woprawdźitu dwurěčnu normalitu po cyłym serbskim sydlenskim rumje zwoprawdźić. Bilingualna normalita rěka, zo móžetej so serbšćina a němčina na samsnym městnje a w samsnym času runohódnje nałožować.