ZARI na SubSorb festiwalu ZARI na SubSorb festiwalu

ZARI na druhim SubSorb festiwalu

Wosrjedź meje (16.-18.5.) wotmě so we Wojerowskej Kufa druhi SubSorb festiwal.

Zo bychu woprawdźe wšitcy wopytowarjo festiwala serbsce rěčeć móhli, staj sobudźěłaćerjej projekta ZARI / wobłuk kultura wosebity kurs “serbšćina za festiwale” poskićiłoj. Wotpowědnje zabawnemu charakterej zarjadowanja staj zestajiłoj zakładny wokabular za festiwale. W běhu połdra hodźiny pomhachu wobdźělnikam sebi mały słownik napisać. Z jeho pomocu móža so n. př. serbsce předstajić abo sebi w korčmje piwo a palenc skazać. Dale su nawukli słowa, kotrež trjebaš, hdyž sy so zalubował abo hdyž móže ći něchtó na pěc lězć. Ke kóždej ze šěsć jednotkow nawuknychu žortnu mudrosć abo přisłowo.

A zo njeby wučba přesucha była, móžachu sej słódny palenčk, wězo bjez alkohola, skazać.