Slepo: Žiwa slepjanšćina a burska płachta w tamnišej cyrkwi Slepo: Žiwa slepjanšćina a burska płachta w tamnišej cyrkwi

Něhdźe 40 zajimcow je sej štwórtk w Slepjanskej cyrkwi wustajeńcu „Płachta pełna hulicowańkow“ wobhladało. Rěčna motiwatorka Juliana Kaulfürstowa předstaješe z originalnymi natočenjemi Slepjansku serbšćinu a powědaše wo swojich dožiwjenjach z maćernorěčnymi ludźimi wjeskow wokoło Slepoho, hdźež běšě w lětach 2010 do 2015 awtentisku slepjanšćinu nahrawała. Tema zarjadowanja bě zdobom płachta, burski grat, kiž je so něhdy wšudźe za wšelakore dźěła wužiwała. Wopytowarki, kiž běchu jako młodźi holcy hišće z płachtu dźěłali, pokazachu wšelake warianty wjazanja wokoło ćěła. Zhromadnje z wosadnej fararku Jadwigu Malinkowej zaspěwachu wopytowarjo na kóncu zarjadowanja Slepjanske kěrluše.