Serbska katolska drasta w běhu časow Die sorbisch-katholische Tracht im Wandel der Zeiten

Někak 20 žonow z Wotrowa hač do Ćiska je sej na přeprošenje ZARI-wobłuk kultura, wutoru na prózdnym popołdnju do Kulowa dojěło. Z wulkim zajimom sćěhowachu słowam Andreje Pawlikoweje, kotraž přednošowaše k temje “Serbska katolska drasta w běhu časow ”. Wona wěnowaše so z pomocu mnoho zajimawych wobrazow, kotrež zestaji do wobšěrneje prezentacije, prašenjam: Kajka je drasta hdy wupadała? Kak so drastowe dźěle mjenuja a hač su regionalne rozdźěle?

Hdyž su něhdy jasniše rozdźěle mjez jednotliwymi wosadami widźeć byli, tak su so tute skerje zhubili. Jenož wšelake pomjenowanja drastowych dźělow su w  kónčinach dźensa hišće znate. Tak rěka čorny bant w Kulowje šnórki a pod brodu njenoša Kulowske žony čěpc ale mašku. Z wulkim zajimom sćěhowachu zajimče wuwjedźenjam knjeni Pawlikoweje a hodźina so spěšnje minje.

Wšitcy přitomni wužichu składnosć sej po přednošku na druhim poschodźe Jakubecoweho wustawa wot towarstwa Bratrowstwo zaměstnjenu “Komorku za serbsku drastu” wobhladać. Hłownej zamołwitej za komorku, Kristin Belkotowa a Seraphina Pašcyna, pokazaštej što je so hižo nazběrało a hodźi so hižo wupožčować.