Po slědach starych křižow a kamjenjow Po slědach starych křižow a kamjenjow

Sobotu, 24. oktobra, je so skupina 12 ludźi na puć podała, zo by wjace wo stawiznach starych křižow a kamjenjow zhoniła.

Bosćij Čórlich z Hruboćic bě za nas tójšto zajimawostkow wokoło tutych kamjentnych swědkow spřihotował. Tak nam powěda, zo maš mjez Kinsporkom a Zhorjelcom wjacore sta tajkich křižow a pomnikow. Woni su zdobom časowi swědkojo prjedawšeho žiwjenja we Łužicy. Hustohdy dopominaja křiže na ludźi, kotřiž su z hłodom wumrěli. Druhe zaso powědaja wo surowych wašnjach a wotprawjenjach ludźi, kiž su so za swoje prawo zasadźili. Puć wjedźeše nas z Jaseńcy pola Sokolcy přez Delany pod Čornobohom, Splósk a Bukecy hač do Plusnikec. Wosebje zajimawe běchu stawiznički wokoło serbskeho fararja Jana Kiliana, kotryž je srjedź 19. lětstotka z cyłej swojej wosadu do dalokeho Texasa wupućował a tam załožił serbske sydlišćo Serbin. Tež w jeho swójbje bě so we 18. lětstotku surowy njeskutk stał. W Delanach pod Čornobohom zabije so po słowach Bosćija Čórlicha muž, kiž bě přez polo susodneho bura do Budestec kemši chcył. Kamjeń, kiž wo tym swědči, je so hakle před něšto lětami zaso namakał. Zajimawa jězba po slědach kamjentnych swědkow časa so skónči zaso w Jaseńcy, hdźež sej wobdźělnicy zhromadnje hišće zaspěwachu stary serbski ludowy spěw „ Do Jenkec na piwo njepóńdźemy“.

Lucian Kaulfürst