Křińčki přihotowali a serbski nałožk zeznali Křińčki přihotowali a serbski nałožk zeznali

Srjedu, 15.04.2026 zetka so skupina zajimowanych dorosćenych a dźěći w Delnjowujězdźanskim towarstwowym rumje, zo bychu serbski nałožk “Křińčkow” zeznali a tež sami wuspytali.

Na spočatku předstaji rěčna motiwatorka ZARI Raphaela Wićazowa přitomnym, zo darja so křińčki wosebje na serbskich kwasach wot kmótrow kwasneho pora. Nimo toho rozkładźe, kak so křińčki přihotuja. Přitomni wuspytachu so potom tež hnydom sami. W čiłej rozmołwje zwěsćichu někotři, zo maja tež hišće tajke drjewjane sudobja w domjacnosći, ale njewědźachu za čo tute wužiwać.

Z tróšku sćerpliwosću nasta skónčnje wjele krasnych butrowych wowckow.  Z čerstwym zelowym chlěbom přitomnym na kóncu tež hišće butrowa pomazka zesłodźi.

Za to wužiwachu pak jenož butru tych wowckow, kotrež njeběchu so tak derje radźili. Rjane eksemplary wzachu sej přitomni sobu domoj, zo bychu swójbnym serbski nałožk předstajili. Delnjowujězdźanske domizniske towarstwo dźakowaše so za zajimawe serbske popołdnjo.