Serbske reje we Wódnym mužu Serbske reje we Wódnym mužu

To běše rjany wječor na žurli Malešanskeho hosćenca „ Wódny muž“, hdźež bě něhdźe 30 ludźi přichwatało, zo bychu so na dźěłarničce „ Serbska reja“ wobdźělili. Dr. Theresa Jacobsowa ze Serbskeho instituta bě do Malešec přijěła, zo by wobdźělnikam najprjedy wo stawiznach serbskich ludowych rejow powědała, a potom z nimi hromadźe aktiwnje rejowała. Serbski institut poskića lětsa składnostnje swojeje 75. róčnicy pod hesłom „Sorabistika po puću – Sorabistik vor Ort“ tajke a hinaše kulturno-wědomostne zarjadowanja.

W přednošku dr. Jacobsoweje zhonichu přitomni mjez druhim, zo wobsteješe něhdy w Malešecach „Serbska kulturna skupina Malešecy“. Na fotach spóznachu wopytowarjo tež te jedne abo druhe znate mjezwočo. Po něhdźe tři běrtlki hodźinje podachu so wšitcy potom do aktiwneho rejowanja. Nětko zeznachu so ze starym serbskim kołom a dalšimi skupinskimi a porikowymi rejemi. A što hdy by něchtó wódny abo lačny był? Na to běchu so čłonojo serbskeho towarstwa Nadźija z.t. wězo přihotowali. Tak móžachu sej rejowarjo w padźe sprócnoty cocktail popřeć, abo sej kołbasku zesłodźeć dać. Po něhdźe třoch hodźinach podachu so wšitcy zaso domoj ­– nasyćeni a z wjeselom we wutrobje.

Nochceš-li ničo skomdźić, potom skazaj sej naš wokolnik.

Wokolnik skazać
wróćo na startowu stronu