„Serbska rěč w našim regionje“ – wulka studija so zahaji „Serbska rěč w našim regionje“ – wulka studija so zahaji
Kotry wuznam ma serbšćina za wobydlerjow Hornjeje Łužicy? Tute a dalše prašenja ma reprezentatiwna studija projekta ZARI wotkryć, kotraž so wot póndźele, 16.02.2026 přewjedźe. Podobne a přirunajomne přepytowanje je so posledni raz před něhdźe 40 lětami přewjedło. Aktualne a wědomostnje wobkrućene daty wo situaciji hornjoserbšćiny dźensa njepředleža.
Dr. Cordula Ratajczakowa je nawodnica za rěčne slědźenje w projekće ZARI a ma cyłkownu wědomostnu zamołwitosć za studiju. „Efektiwna rěčna politika a naslědne spěchowanje serbskeje rěče měłoj na woprawdźitej potrjebje bazować. Naša studija skići za to spušćomny zakład datow“, měni kulturna wědomostnica. Wědomostne předewzaće podpěra mjez druhim sociolinguistka prof. dr. Nicole Dołowy.