„Dźeń našich rěčow – Dyrdomdej susodstwa“ w ramiku akciskich dnjow sakskeho krajneho zarjada za kubłanje w susodnych rěčach

Dnja 25.09.2025 přeprosychu motiwatorojo projekta ZARI pod hesłom „Dźeń našich rěčow – Dyrdomdej susodstwa“ na pisany rěčny swjedźeń do farskeje bróžnje w Rakecach. Někak 50 hosći je přeprošenju šćehowało a dožiwi popołdnjo z mnoho serbskimi poskitkami. Zarjadowanje wotme so w ramiku akciskich dnjow sakskeho krajneho zarjada za kubłanje w susodnych rěčach (Lana).  Za wulkich a małych hosći poskičichu so kreatiwne, hudźbne a kulinariske poskitki, při kotrychž zeznachu serbsku rěč a kulturu. Wosebitostka běše wustup ukrainskeje rejwanskeje skupiny z Budyšina. Tež Ukrainčenjo maja dobry zwisk do Rakec – zetkaja so prawidłownje w farskej bróžni. Tak běše popołdnjo dobra składnosć za dźěći a dorosćenych susodnej rěči zeznać a so raz intensiwne do tutych zanurić.