Region wokoło Slepoho
Region um Schleife
Motiwatorka za serbsku rěč
Juliana Kaulfürstowa | Kaulfürst
Region wokoło Slepoho
W Slepjanskim regionje sym hižo wot lěta 2010 aktiwna. Horju so za tamnišu slepjanšćinu: krasnu, klinčacu rěč, kotruž bohužel jenož hišće něhdźe 20 ludźi wobknježi. Wjele lět hižo sym čłonka towarstwa Njepilic dwór Rowne z.t. a Kólesko z.t. w Slepom. Z tym čuju so mjez ludźimi zakótwjena.
Wo mojim dźěle
Über meine Arbeit
Zwěr sej a čiń sobu!
Njeboj so serbskeho swěta! Zhromadnje so do njeho předrějmy – na pućowanjach, spěwnych wječorach, přednoškach abo serbskich bjesadach. Ludowe spěwy, powěsće a burske kaznje, ale tež cyły kosmos interneta su mi k pomocy, hdyž pokazuju wam wšelake móžnosće, swoje serbske korjenje lěpje zeznać a serbšćinu nawuknyć.
Nazwučuju z wami stare a nowe spěwy a was poradźuju, hdyž planujeće serbski kulturny program. Kóždy měsac wuchadźa w gmejnskim łopjenu moja “Serbska strona” z rěčnym kursom, hrónčkami, hódančkami a přeprošenjemi na naše//moje zarjadowanja. Štóž chce so do rěče bóle//hłubšo zanurić, tomu poskićuju rěčne hodźinki abo konwerzaciske koło. Zbližić móžemy so serbšćinje (z małym zadźěwkom) tež z pomocu Bookii-pisaka abo lochkimi hrami. Zawěsće za kóždeho, kotryž chce so serbskemu swětej a rěči přibližić, to prawe namakamy.
Projektowe wjerški
Projekthighlights
Serbske pućowanja we Slepjanskej wokolinje
Pućujo so do serbskeje rěče zanurić? To funguje! Kóždy dóstanje temowe łopjeno z QR-codeom, zo by sej słowa a wobroty móhł přečitać a zdobom naposkać. Potom trjebamy jenož hišće dobru naladu a přijomnu skupinku sobupućowacych.
Naju serbske pućowanja wotměwaja so štyri króć wob lěto ze wšelakimi temami. Přewodźujetaj was dr. Hync Rychtaŕ a Juliana Kaulfürstowa, kotrejž z wami tež spěwataj. Wězo njepobrachuje tež ženje zastaranje z pićom a jědźu – pak něhdźe załožimy abo piknikujemy wosrjedź přirody.
Čitanje powěsćow
Powěsće z wokoliny wostanu za nas zajimawe, dokelž jewja so w nich znate blečki, mjena a postawy. W běhu čitanja wospjetujemy abo nawuknjemy serbske słowa, kotrež so w powěsćach jewja.
Tak namaka kóždy zawěsće spěšnje přistup k serbskim powědkam Mužakowskeje hole. Připołdnica, błudnički a wódny muž su znate – ale znajeće wy hrózbnych grabow? Dajće so překwapić a wjesć do stareho swěta a rjanych serbskich sadow.
Spěwanske popołdnja
Ja sama sym slepjanšćinu najprjedy z pomocu Slepjanskich ludowych spěwow wuknyła. Skoku sym sej wěsta była: Z jich tekstami da so wuběrnje rěč wuknyć! To chcu tež wam sposrědkować.
Serbske spěwanske popołdnjo a adwentne spěwanje zmóžnitej nam, sej zhromadnje wjesele zaspěwać. Při tym tež njejsmy sami – přewodźuje nas akordeonist, tak zo njetrjebamy spłóšiwi być. Kóždy njech po swojim spěwa, mjelčo abo mócnje.
Kontakt
Kontakt
Juliana Kaulfürstowa | Kaulfürst
motiwatorka za serbsku rěč wokoło Slepoho a Wochoz
juliana.kaulfuerstowa@domowina.de
035773 169990