Serbske jejka za zahrodku Sorbische Ostereier für deinen Garten

Prěni raz smy poskitk loni w bibliotece Brigitty Reimannoweje we Wojerecach poskićili. Tam so nowostki wuspytachu a wobkedźbowane zmylki a z tym trěbne změny wudźěłachu. Tak móžu poskitk lětsa derje přiměrjeny šěršemu publikumej poskićić, na přikład za popołdnjo z towarstwami wokoło Wojerec, z ludnosću w Ptačecach a tež za publikum w Přiwćicach. To da kóždemu wosobinsce móžnosć sej wjacore razy dojěć na tajki poskitk. A z tym je poskitk tak rjec pućowacy.

Trěbny material so zaruči a přihotuje wot mnje, Marije Šołćic. Kaž loni změjemy přihotowane jeja za plasty, permanentne pisaki, nalěpki a kubłanski material z principami serbskich jejkow. Tak jedna so wo kubłanski a zdobom rěčny poskitk. Druhi material móže być keramika, kotraž so do toho pali. Přidatnje k lońšemu poskitkej mam městno přihotowane, na kotrymž so jedna abo wjacore barby pisaneho wóska wohrěwaja. Móže to być módra, čerwjena, zelena abo běła. Na tute městno móžeće so na kóncu kreatiwneho dyrdomdejstwa podać, jeli chceće přidatnje k nalěpkam jejka bosěrować. Cyle na kóncu so na krosnje wisace jejka wonka lakěruja z pomocu transparentneho sprayja.