"Pik-ng" w Přiwćicach

Rjanu, přijomnu atmosferu dožiwi pjatk, 12. junija něhdźe 20 ludźi w Přiwćicach na Knježim dworje před Serbskim projektowym běrowom. Mjez hosćimi běše samo hósć z Nižozemskeje, kotryž so tuchwilu w Budyšinje dalekubła. Hižo druhi raz přeprošeše motiwator za serbsku rěč, Lucian Kaulfürst, na tak mjenowany “Pik-nyg.” Za tutym mjenom chowa so rjana, přijomna zhromadnosć na łuce, při kotrež wotpowědny kulturny poskitk pobrachować njesmě. Jako kooperaciski partner serbske towarstwo Nadźija z. t. projekt podpěra.  Loni běchmy při słónčnym wjedrje hotel insektow ze serbskimi pomjenowanjemi wuhotowali. Lětsa přichwata Paul “Geigerzähler” Nagel a na swojich huslach mócnje zahra. Kulinarisce poskićowachu so nimo praženych kołbasow tež cocktaile. Bohužel pak bě wjedro tróšku pancate, a tak su wopytowarjo na ławkach pod pawiljonom sedźeli a sej hudźbu Berlinskeho huslerskeho wirtuoza lubić dali. Hagen Jurack, předsyda towarstwa Nadźija z. t., chce zarjadowanje tež klětu rady zaso přewjesć resp. podpěrać.

Přichodny serbski projekt, wotměje so pjatk, 31.7.2026 w 16 hodźin. Potom přeprosy towarstwo Nadźija na kolesowarsku turu po serbskich impresijach. Start jězby z nadawkami a hódančkami kołowokoło serbskich stawiznach Malešanskeho regiona započina so w Malešecach.