W našim projekće dźěłaja docenća, rěčni motiwatorojo, posrědkowarjo kultury, projektowi sobudźěłaćerjo a wědomostnicy zhromadnje w teamje. Naše běrowy nadeńdźeće w Slepom, we Wojerecach, w Radworju, w Přiwćicach, w Delnim Wujězdźe kaž tež w Budyšinje. Spěchowanje dorosta je nam nimo toho wutrobita naležnosć. Šulerjo a studowacy su lubje witani a móža so rady za praktikum abo honorarne dźěło pola nas přizjewić.
In unserem Projekt arbeiten Dozenten, Sprachmotivatoren, Kulturvermittler, Projektmitarbeiter und Wissenschaftler zusammen in einem Team. Unsere Büros sind in Schleife, Hoyerswerda, Radibor, Preititz, Uhyst (Spree) sowie in Bautzen. Zudem ist uns die Förderung von Nachwuchs eine Herzensangelegenheit. Schüler und Studenten sind immer willkommen und können sich gerne für ein Praktikum oder Honorararbeit bei uns melden.
Projektowy management koordinuje wšitke wotběhi projekta. K tomu słuša mjez druhim wuwiće projektoweho plana, koordinacija personala za wuwjedźenje nadawkow kaž tež dohlad nad financami a koordinacija zjawnostneho dźěła. Wobstajne dohladowanje dźěłoweho postupa je dalši stołp dźěławosće, zo by so projektowy plan dodźěržał a kwalita dźěłowych wuslědkow zawěsćiła.
Projektowa asistenca při tym podpěruje a je narěčenski partner při wšěch naležnosćach a prašenjach.
Diana Pawlikowa | Pawlik
nawodnica projektoweje koordinacije
diana.pawlikowa@domowina.de
03591 3163850
Diana Pawlikowa | Pawlik
nawodnica projektoweje koordinacije
Štó sym?
Rěkam Diana Pawlikowa, sym 36 lět stara a bydlu ze swojej swójbu w Smječkecach. Wotrostła sym w Kukowje a po maturje sym europsku dobrowólnu słužbu w Irskej zabsolwowała. Po tym sym so na studij do Drježdźan, Lipska a Brna podała.
Što je moja motiwacija za dźěło w tutym projekće?
W projekće dźěłam jako projektna managerka. Mi lubi so pisanosć a wšelakorosć nadawkow. Mam styk ze wšelakimi ludźimi, dyrbju we wšědnym dnju fleksibelnje na njewočakowane situacije reagować.
Kajke powołanske nazhonjenja mam?
Po studiju European Studies sym we wšelakich projektach dźěłała a mnohostronske nazhonjenja zběrała. Zdobom móžu swoje nazhonjenja z čestnohamtskeho dźěła tule w projekće nałožować, na přikład jako předsydka towarstwa Pawka.
Što we wólnym času rady činju?
Zhromadny čas rady ze swojej swójbu wužiju. Často smy wonka w přirodźe. Lubuju swoju zahrodu a w njej rady něšto sadźam a žněju. Nimo toho rady po našej krasnej Łužicy kolesuju.
Nancy Kurjatowa | Kurjat
projektowa asistenca
nancy.kurjatowa@domowina.de
03591 3163854
Nancy Kurjatowa | Kurjat
projektowa asistenca
Štó sym?
Moje mjeno je Nancy Kurjatowa a sym 32 lět stara.
Bydlu ze swojej swójbu, to rěka z mandźelskim a třomi synami, w Nowym Łusču.
Što je moja motiwacija za dźěło w projekće?
Serbšćinu dołhodobnje zaso wožiwić – naš zaměr je 100.000 serbowacych w lěće 2100 po cyłej Łužicy. Krok po kroku chcemy to docpěć. Hdyž móžu při tym k pomocy być – ćim lěpje!
Kajke powołanske nazhonjenja mam?
Swoju powołansku karjeru startowach w Smochčanskim kubłanišću swj. Bena. Tam absolwowach swoje wukubłanje jako běrowowa překupča. Po tym sym tam wjele lět w sekretariaće a w knihiwjednistwje dźělała. Po swojim prěnim staršiskim času dźěłach tam při recepciji, kotruž naposledk tež nawjedowach.
Što we wólnym času rady činju?
Často kolesuju a rady w zahrodźe dźěłam.
Najwjetši dźěl swojeho swobodneho časa pak přežiwjam ze swójbu a z našimi přećelemi.
W rěčnym kubłanju wuwiwaja so nowe formaty za nawuknjenje rěče. Při tym wusměrja so poskitki wosebje na dorosćenych, kotřiž chcedźa serbsku rěč nawuknyć. Wobsahowe wudźěłanja a přewjedźenje intensiwnych poskitkow słušeja k nadawkam docenta. Rěč je wažny kluč, wuknjacym dorosćenym nowe puće wotkryć. Ze wšelakimi naprawami chcemy zdobom serbšćinu zaso bóle we wšědnym dnju wšěch Łužičanow zakótwić.
Julian Nyča
nawoda rěčneho kubłanja
Štó sym?
Sym Julian Nyča, rodźeny Budyšan a přeswědčeny dwurěčny Łužičan ze serbsko-ewangelskimi korjenjemi. Maćeršćinu swojeho dźěda sym hakle jako młodostny započał znowa wuknyć. Mjeztym mam sam swójbu, w kotrejž jenož serbujemy. Studował sym slawistiku a kulturne wědomosće na Humboldtowej uniwersiće w Berlinje.
Što je moja motiwacija za dźěło w projekće?
Projekt ZARI koncentruje so na wožiwjenje serbšćiny w kónčinach, hdźež so wona tuchwilu z historiskich přičin tak husto njenałožuje. Jedna z tutych kónčin bě domizna mojich serbskich prjedownikow. Tuž mam hižo ze swójbnych stawiznow sem wulku motiwaciju, serbšćinu tam zaso zadomić, hdźež bě wona hišće před mało generacijemi wobstatk wšědneho dnja. Jako noworěčnik chcu wuměnjenja stworić, zo bychu sej tež druzy našu rěč tak lochko a zabawnje kaž móžno zaso přiswojili.
Kajke powołanske nazhonjenja mam?
Studij wotzamknywši běch štyri lěta sobudźěłaćer projekta “sotra”, kotryž je prěni serbsko-němski awtomatiski přełožowar wuwił a wozjewił. Připódla hižo wjacore lěta započatkarjam serbšćinu podawam, a to we wšelakich skupinach na wjeskach tak tež digitalnje. Nimo toho zaběram so ze wšelakimi digitalnymi serbskimi projektami, kaž ze serbskej geografiskej online-kartu, serbskej Wikipediju abo přełožuju webstrony a aplikacije.
Što we wólnym času rady činju?
Přewšo rady pućuju, hač po łužiskej domiznje abo we wukraju, wosebje po wuchodnej a juhowuchodnej Europje. Najzajimawše su mi při tym regiony z bohatym a mnohostronskim kulturnym a rěčnym herbstwom. Čestnohamtsce so hižo połdra lětdźesatka w Budyskim Kamjentnym domje angažuju. Wot 2014 do 2023 běch čłon rady Załožby za serbski lud a wot 2019 skutkuju w Radźe za serbske naležnosće Sakskeje.
Rěčni motiwatorojo podpěruja serbske žiwjenje w kónčinach a poradźuja lokalnych akterow tam, hdźež so serbšćina hišće wšědnje njerěči. Regionalnu identitu skrućić, rěčne rumy wobchować a rozšěrjeć a krok po kroku syć mjez zajimcami za serbsku rěč a kulturu wutworić – to su hłowne nadawki rěčnych motiwatorow.
Juliana Kaulfürstowa | Kaulfürst
motiwatorka za serbsku rěč wokoło Slepoho a Wochoz
juliana.kaulfuerstowa@domowina.de
035773 169990
Juliana Kaulfürstowa | Kaulfürst
motiwatorka za serbsku rěč wokoło Slepoho a Wochoz
Štó sym?
Mjenuju so Juliana Kaulfürstowa. Narodźiła sym so w Budyšinje. Za studij slawistiki (čěšćina, bołharšćina) a stawiznow wuměłstwa sym šła do Drježdźan. Po studiju sym štyri lěta w Praze dźěłała a so potom do Łužicy nawróćiła.
Što je moja motiwacija za dźěło w projekće?
W Slepom a wokolinje chcu wćipnosć a zajim za serbšćinu zbudźić. Přeju sej, zo by moje dźěło pomhało, serbski raz regionow wokoło Slepoho a Wochoz zaso wuwědomić a lóšt na serbšćinu wuwabić. Zo bychmy “Dobry dźeń!” a “Bóžemko!” tež w zjawnosći zaso słyšeli.
Kajke powołanske nazhonjenja mam?
Što we wólnym času rady činju?
Raphaela Wićazowa | Lehmann
motiwatorka za serbsku rěč wokoło Wulkeje Dubrawy, Radworja, Rakec, Njeswačidła, Bóšic a Hodźija
raphaela.wicazowa@domowina.de
035935 169970
Raphaela Wićazowa | Lehmann
motiwatorka za serbsku rěč wokoło Wulkeje Dubrawy, Radworja, Rakec, Njeswačidła, Bóšic a Hodźija
Štó sym?
Rěkam Raphaela Wićazowa, sym 42 lět stara a bydlu ze swojim mužom a třomi dźěćimi w Radworju.
Što je moja motiwacija za dźěło jako rěčna motiwatorka?
Sym rodźena Radworčanka a so hižo lěta dołho za serbske žiwjenje w tutej kónčinje angažuju. Z tym mam hižo dobre kontakty k najwšelakorišim cyłkam kołowokoło Radworja.
Kajke nazhonjenja mam?
Sym hižo dlěje hač 16 lět w projektnym dźěle aktiwna. Tež čestnohamsce so hižo wjele lět w kónčinje angažuju, mjez druhim sym sobustawka Radworskeje staršiskeje initiatiwy, čłonka chóra „Meja” a zasadźuju so za zdźerženje Radworskeho dwórnišća.
Što we wólnym času rady činju?
Rady so w přirodźe zhromadnje ze swojim psom wuchodźuju. Zajimuju so za zela a rostliny našeje kónčiny. Wězo rady warju, wosebje z čerstwymi wudźěłkami z našeje wokoliny.
Marija Šołćic | Scholze
motiwatorka za serbsku rěč w Kulowje, Wojerecach a Halštrowskej holi
marija.solcic@domowina.de
03571 601613
Marija Šołćic | Scholze
motiwatorka za serbsku rěč w Kulowje, Wojerecach a Halštrowskej holi
Štó sym?
Sym Serbowka a tworjaca wuměłča z lubosću za serbsku folkloru, serbske nałožki a serbsku rěč.
Što je moja motiwacija za dźěło jako rěčna motiwatorka?
Wobšěrne nazhonjenja a lubosć za to, serbsku dušu dale dawać.
Kajke nazhonjenja mam?
Jako wučerka za rěče – 14 lět – a wukubłarka na polu wuměłstwa – 20 lět – sym serbšćinu dlěje hač 25 lět tež w Francoskej hajiła a ju swojim třom dźowkam do žiwjenja sobu dała.
Što we wólnym času rady činju?
Čitam, pisam, tworju hudźbu a wuměłsku keramiku a mam tójšto dalšich zajimow.
Frank Knobloch
motiwator za serbsku rěč wokoło Łaza, Sprjewineho Doła a Delnjeho Wujězda
frank.knobloch@domowina.de
0171 4138016
Frank Knobloch
motiwator za serbsku rěč wokoło Łaza, Sprjewineho Doła a Delnjeho Wujězda
Štó sym?
Rěkam Frank Knobloch. Sym 57 lět stary a bydlu w Delnim Wujězdźe.
Wot 1. nowembra 2022 skutkuju jako serbski motiwator za ZARI. W tutej funkciji staram so wo gmejnje Sprjewiny Doł a Łaz kaž tež wo Delni Wujězd jako dźěl Hamorskeje gmejny.
Što je moja motiwacija za dźěło jako rěčny motiwator?
Mam serbske korjenje a chcu aktiwnje tomu přinošować, zo słušatej serbska rěč a kultura perspektiwisce zaso cyle samozrozumliwje do wšědneho dnja ludźi w cyłej Łužicy.
Kajke nazhonjenja mam?
Mam nazhonjenja w priwatnohospodarskim kaž tež w zjawnoprawniskim wobłuku, na přikład nastupajo próstwy za spěchowanske projekty a zwoprawdźenje projektow kaž tež w towarstwowym dźěle.
Što we wólnym času rady činju?
Rady přežiwjam čas ze swójbu a z přećelemi, pućuju a w zahrodźe dźěłam.
Lucian Kaulfürst
motiwator za serbsku rěč wokoło Malešec, Kubšic a Bukec
lucian.kaulfuerst@domowina.de
035932 120131
Lucian Kaulfürst
motiwator za serbsku rěč wokoło Malešec, Kubšic a Bukec
Štó sym?
Narodźił sym so jako štwórte wot pjeć dźěći 1984 w Budyšinje a tam tež dźensa hišće bydlu. Po šuli sym najprjedy raz sekretarske, potom hladowanske a naposledk terapeutiske wukubłanje zakónčił. Z wulkim zbožom a Božim wjedźenjom sym potom k dźěłu jako rěčny motiwator přišoł.
Kajke nazhonjenja mam?
Jako započach, tehdy hišće na honorarnej bazy, jako motiwator dźěłać, spěšnje pytnych, zo so ludźo tu we wokolinje lědma znaja, byrnjež w samsnej wsy bydlili. To krok po kroku změnić a ludźi hromadźe wjesć bě a je mój pohon, so dale na tutym polu angažować a do nastawaceje noweje zhromadnosće paralelnje tež serbšćinu „zatwarić“.
Što je moja motiwacija za dźěło jako rěčny motiwator?
Sym zwěsćił, zo maja ludźo zakładnu wćipnosć w sebi, štož serbsku rěč a kulturu nastupa. Su jara wotewrjeni a přećelni. Wužadanje pak je, ludźi k tomu pohnuwać, zo so sami angažuja. Ale wšo budźe!
Florian Kaulfürst
motiwator za serbsku rěč
florian.kaulfuerst@domowina.de
03591 3163855
Florian Kaulfürst
motiwator za serbsku rěč
Štó sym?
Rěkam Florian Kaulfürst. Narodźich so 1981 w Budyšinje. Sym wukubłany předawar za sportowe twory, socialny asistent a kubłar.
Moja motiwacija za dźěło w projekće?
Chcu strachi a wobmyslenja ludźi we wobchadźe ze Serbstwom wottwarić. Staršich Witaj-dźěći chcu motiwować a podpěrować, runočasnje z dźěsćom rěč nawuknyć. Mi je wažne, zo ludnosć pozitiwnje wo Serbach mysli a rěči.
Powołanske nazhonjenja:
Pjeć lět běch předawar sportowych tworow w Budyšinje a Badensko-Württembergskej. 10 lět dźěłach jako Witaj-pěstowar w Budyšinje.
Wólny čas:
Sym aktiwny čłon towarstwow Sokoł Budyšin, Škit Budyšin kaž tež Dźěłań dźeń (Tagwerk e.V.).
Hraju rady wolejbul, footbag, frisbee, boule, blidotenis, bijadło a wjele wjace.
Wobhospodarju zjawnu zahrodu na Rězniskej w Budyšinje a spěwam rady.
Posrědkowarjo kultury su za wšelake wobłuki, kaž n. př. za muzeje a domizniske stwy, hudźbu a reje, dźiwadło a film kaž tež ludowe wuměłstwo, rjemjesło a sport zamołwići. Wosebje čestnohamtskim towarstwam a skupinam steja woni jako narěčenscy partnerojo a přewodnicy po boku. Dale spěchuja kulturni posrědkowarjo natwar syće mjez čestnohamtskimi akterami a kulturnymi zarjadnišćemi.
Sonja Hrjehorjowa | Rehor
nawodnica kulturneho wobłuka
sonja.hrjehorjowa@domowina.de
03571 6084614
Sonja Hrjehorjowa | Rehor
nawodnica kulturneho wobłuka
Štó sym?
Rěkam Sonja Hrjehorjowa, sym mać pjeć dorosćenych dźěći a bydlu w swojej ródnej wjesce, w Sulšecach pola Kulowa.
Što je moja motiwacija za dźěło w projekće? Chcu sobu na tym dźěłać,
Kajke powołanske nazhonjenja mam?
Sym kulturne wědomosće a sorabistiku studowała. Po studiju sym w Serbskej kulturnej informaciji prěnje powołanske nazhonjenja zběrała. Wot 2016 dźěłach pola Domowiny jako regionalna rěčnica abo projektna managerka.
Što we wólnym času rady činju?
Rady hraju lajske dźiwadło a dźěłam za Kulowske towarstwo Bratrowstwo, wušiwam a šiju.
Jadwiga Bryckec | Brützke
datowa managerka / kulturna posrědnica
jadwiga.bryckec@domowina.de
03591 3163853
Jadwiga Bryckec | Brützke
datowa managerka / kulturna posrědnica
Štó sym?
Rěkam Jadwiga Bryckec. Pochadźam ze wsy, w kotrejž so hižo we wšědnym žiwjenju njeserbuje – z Kubšic. Nětko bydlu w Zhorjelcu. Po abiturje studowach nabožinske wědomosće a filozofiju, doniž njejsym so na studij medicinskeje techniki podała, kotryž sym z masterom zakónčiła.
Što je moja motiwacija za dźěło jako datowa managerka/kulturna posrědnica?
Chcu rumy za serbsku rěč tworić a wosebje wokolinu podpěrować, w kotrejž so hižo njeserbuje. Tole chcu z kulturnymi poskitkami zwjazać.
Kajke powołanske nazhonjenja mam?
W firmje SKAN sym jako projektna managerka za izolatory dźěłała. SKAN je mašinotwarske předewzaće, kotrež zhotowja graty a izolatory za aseptisku produkciju.
Što we wólnym času rady činju?
Hladam rady sciencefictionowe serije abo pućuju po Limasu blisko Zhorjelca.
Što su moje nadawki na dźěle?
Hłowna intencija mojeho dźěła je, zajimcam za serbsku kulturu a rěč přistup a přehlad wo našich mnohich poskitkach wolóžić. Za to katalogizuju na přikład serbske kótwišća, kaž muzeje a kulturne cyłki (, rejowanske skupiny) a kubłanske srjedźišća, kotrež chcemy kartografisce na internetnej stronje zwobraznić.
Dale sym zamołwita za datowu banku našich wobdźělnikow mnohich kursow, kotrež naši rěčni motiwatorojo poskićuja.
Rěč spěchowacych naprawow je tójšto, patentrecept za rewitalizaciju pak njeje. Štó z kim w kajkej situaciji serbuje, čehodla abo čehodla nic, to je w kóždej kónčinje hinak. Z rěčnym slědźenjom stworimy zakład za ludźom přiměrjene a tohodla wuspěšne rěčne wozrodźenje.
Dr. Cordula Ratajczakowa | Ratajczak
nawodnica rěčneho slědźenja
cordula.ratajczakowa@domowina.de
03591 3163851
Dr. Cordula Ratajczakowa | Ratajczak
nawodnica rěčneho slědźenja
Štó sym?
Wotrostła sym w Gelsenkirchenje w swójbje, kotraž z Łužicy pochadźa. Serbšćinu pak sej njeje zachowała. Dostudowawši w Frankfurće nad Mohanom kulturnu antropologiju zaběrach so ze swojimi korjenjemi a pisach masterske dźěło wo katolskich Serbach. 1995 sym ze swójbu do Łužicy ćahnyła, tu serbšćinu nawuknyła a z tym swój wosobinski kaž tež swójbny „rewitalizaciski projekt“ zahajiła. (2) Moje nazhonjenja z tym mje pohonuja, serbšćinu tež w kónčinach Łužicy wožiwjeć, hdźež ju w swójbach dale dali njejsu. (3) Nimo dźěła we wšelakorych wědomostnych projektach sym dlěje hač 10 lět jako kulturna redaktorka w Serbskich Nowinach skutkowała. (4) Hdyž runje na serbske čitanja, dźiwadło, wustajeńcy abo koncerty njechodźu a hłowa přestawku trjeba, rady płuwam.
Što je mój hłowny nadawk w projekće?
Koordinuju a přewjeduju rěčne slědźenje, kotrež twori zakład za rewitalizaciju serbšćiny we Łužicy. W našim teamje přepytujemy ze sociolinguistiskimi metodami socialne aspekty nałožowanja rěče, slědźimy za nastajenjom ludźi k serbšćinje kaž tež nastupajo wjacerěčnosć a analyzujemy rěčne ideologije, kotrež tomu zadźěwaja, zo ludźo serbuja. Z tutymi dopóznaćemi podpěrujemy praktisku dźěławosć cyłeho teama.
Što je moja motiwacija za dźěło w projekće?
Zběram a analyzuju biografije ludźi nastupajo jich nazhonjenja ze serbšćinu, wobdźěluju so na zetkanjach a zarjadowanjach a je sociolinguistisce wuhódnoćuju. Zběram wšitke informacije z teama ZARI a ze sociolinguistiki, zo bychmoj zhromadnje z Nicole Dołowy-Rybińskej akciski plan za rewitalizaciju serbšćiny we Łužicy nadźěłałoj. Dźěłamoj na tym, zo so diskursy wo serbšćinje změnja, a to nic jenož w teamje, ale předewšěm w zjawnosći. Naše dźěło je tuž wjace hač ryzy na teoretiske dopóznaća wobmjezowana wědomosć – zwjazujemoj teoriju a praksu jako „action research“ z cilom, rěčne ideologije a rěčnu praksu změnić na dobro serbšćiny a dwurěčneje normality we Łužicy. Łužica ma so woprawdźe dwurěčna stać!
prof. dr. Nicole Dołowy-Rybińska
wědomostna sobudźěłaćerka
nicole.dolowy-rybinska@ispan.edu.pl
03591 3163851
prof. dr. Nicole Dołowy-Rybińska
wědomostna sobudźěłaćerka
Štó sym?
Sym antropologowka a sociolinguistka a dźěłam jako profesorka na Instituće za slawistiku Pólskeje akademije wědomosćow. Minjenych 20 lět sym so ze wšelakorymi sociolinguistiskimi aspektami wohroženych mjeńšinowych rěčow zaběrała: z rěčnym aktiwizmom, rěčnej politiku, kubłanjom a z rewitalizaciju. Sym slědźiła wo wjacorych europskich mjeńšinach, mjez druhim pola Bretonow, Walizow, Serbow a Kašubow. Tuchwilu nawjeduju projekt „Linguistiska mnohotnosć w Pólskej” (2021–2026), w kotrymž přewjeduju studiju wo etnolinguistiskej witaliće njepřipóznatych rěčow w Pólskej. Wot 2017 sym slědźerski projekt wo noworěčnikach na Serbskim gymnaziju Budyšin přewjedła, zhromadnje z Cordulu Ratajczakowej. Něšto měsacow pozdźišo smój z Cordulu projekt SMiLE (2018–2019) wo rěčnej rewitalizaciji w Hornjej a Delnjej Łužicy zahajiłoj. Dožiwiwši tute intensiwne slědźenje we Łužicy a dobre zhromadne dźěło z Cordulu spóznach, kak wažne za slědźerku je, swoju wědu njewužiwać jenož za wědomostne dźěło, ale předewšěm za to, mjeńšinu podpěrać. Tohodla chcu ze swojej sociolinguistiskej wědu podpěrować tych, kotřiž w praksy strategije rěčneje rewitalizacije serbšćiny wuwiwaja a tak k přichodej serbskeje rěče a zhromadnosće přinošować. Lubuju sociolinguistisce slědźić, tuž nimam wjele wólneho časa. Hdyž pak mam chwile, so rady ze swojimi psami w lěsu wuchodźuju.
Što je mój hłowny nadawk w projekće?
Jako profesorka kulturneje wědomosće a sociolinguistiki na Instituće za slawistiku Pólskeje akademije wědomosćow a ze swojimi nazhonjenjemi ze slědźenjow wo mnohich rěčnych mjeńšinach w Europje podpěram wědomostne dźěło teama. Mjez druhim mam koncept za studiju etnolinguistiskeje witality serbšćiny we Łužicy wudźěłać.
Što su moje dalše ćežišća w projekće?
Analyzuju zhromadnje z Cordulu Ratajczakowej rěčne biografije a wobdźělace so wobkedźbowanja. Chcemoj mustry w dwurěčnej a jednorěčnej praksy kaž tež nastajenje ludźi k rěčomaj we Łužicy identifikować, kotrež komunikaciju wobwliwuje. Zhromadnje dźěłamoj tež na koncepće za studiju wo etnolinguistiskej witaliće we Łužicy. Mój nadawk tohorunja je, na inspirowace strategije rěčneje rewitalizacije druhich europskich mjeńšin skedźbnić. K tomu tež słuša, zastupjerjow europskich mjeńšinowych rěčnych agenturow na dźěłarničku přeprosyć, zo bychmy sej nazhonjenja wuměnjeli. Zhromadnje z Cordulu dźěłam na akciskim planje za rěčnu rewitalizaciju serbšćiny.
Naši motiwatorojo a docenća poskićuja kopicu kursow w pjeć regionach Hornjeje Łužicy. Kóždeho přeprošuja, zo by sej swoje serbske korjenje wotkrywał, serbšćinu na inowatiwne wašnje dožiwjał abo ju wuknył a předewšěm nałožował.
Wobłuki zasadźenja posrědkowarjow kultury:
• muzeje a domizniske stwy
• hudźba a reje
• literatura, dźiwadło, film, nowe medije
• kultura a wuměłstwo, narodna drasta
• sport
Poskitki motiwatorow:
• informacije a kubłanje: zarjadowanja a přednoški wo mnohich serbowědnych? temach
• za nałožowanje serbšćiny: zhromadne pućowanje, warjenje, hornčerjenje a spěwanje
Naše rěčne kursy:
• rěčne kursy, wšelake schodźenki a rozdźělna intensita
• konwersaciske kursy
• rěčni kmótřa a rěčne tandemy
• indiwidualny přewod
Unsere Motivatoren und Dozenten bieten in fünf Regionen der Oberlausitz zahlreiche Kurse an. Sie laden jeden ein, seine sorbischen Wurzeln aufzudecken, das Sorbische auf innovative Weise zu erleben oder zu lernen und vor allem anzuwenden.
Bereiche, in denen unsere Kulturvermittler tätig sind:
• Museen und Heimatstuben
• Musik und Tanz
• Literatur, Theater, Film, neue Medien
• Kunst, Volkskunst, künstlerisches Handwerk, Tracht
• Sport
Bereiche, in denen unsere Sprachmotivatoren tätig sind:
• für Informationen und Bildung: Es werden Veranstaltungen und Vorträge über viele sorbisch-wissenschaftliche Themen organisiert.
• für die Aktivierung der sorbischen Sprache: Es geht um gemeinsames Wandern, Kochen, Töpfern und Singen.
Wir bieten Sprachkurse an:
• auf verschiedenen Stufen und in unterschiedlicher Intensität
• Konversationskurse
• Vermittlung von Sprachpaten und sprachlichen Tandems
• individuelle Begleitung und Beratung
Projekt ZARI je w nošerstwje Domowiny a přewjedźe so wot 2022 hač do 2038. Projekt spěchuje Załožba za serbski lud ze srědkow zwjazkoweho ministerstwa za nutřkowne naležnosće a domiznu na zakładźe rozsuda Němskeho zwjazkoweho sejma w wobłuku programa “Serbska rěč a kultura w strukturnej změnje” za projekty w Swobodnym staće Sakska.
Namakaj za tebje so hodźace dźěłowe městno tu na našej webstronje a požadaj so! Na čo čakaš?
Pytaš za praktikumom abo prózdninskim dźěłom? W našim teamje maš najwšelakoriše móžnosće so wuspytać.
Prašej so nas abo předstaj so nam skrótka z mejlku. Po tym budźemy zhromadnje hladać, kotry wobłuk so za tebje hodźi a do kotreho wobłuka so hodźiš.
Wjeselimy so na Tebje!
W projekće chcemy regionalnu identitu skrućić, rěčne rumy wobchować a nowe wutworić, indiwiduelne poskitki zestajeć a poradźowanje poskićeć. Tomu maja jednotliwe module projekta słužić. Tule hišće raz přehlad wo jednotliwych naprawach:
ZARI ZWJAZUJE
rěče • regiony • ludźi
Twoje prašenja ći rady wotmołwimy a poradźujemy će.
adresa běrowow:
ZARI
Póstowe naměsto | Postplatz 3
(stwa | Zimmer 312)
02625 Budyšin | Bautzen
Póstowa adresa
ZARI
c/o Domowina
Zwjazk Łužiskich Serbow z. t
Zwězk Łužyskich Serbow z. t.
Bund Lausitzer Sorben e. V.
Póstowe naměsto | Postplatz 2
02625 Budyšin | Bautzen
Nošer projekta | Träger des Projektes:
Spěchowarja | Förderer:
Projekt spěchuje so wot Załožby za serbski lud přez srědki Zwjazkoweho ministerstwa za nutřkowne a domiznu na zakładźe wobzamknjenja Zwjazkoweho sejma. / Das Vorhaben wird durch die Stiftung für das sorbische Volk aus Mitteln des Bundesministeriums des Innern und für Heimat aufgrund eines Beschlusses des Deutschen Bundestages gefördert.