Region wokoło Rakec
Region um Königswartha
Motiwatorka za serbsku rěč
Raphaela Wićazowa | Lehmann
Region wokoło Rakec
Indiwiduelne skutkowanje motiwatora w swojej kónčinje je po mojim měnjenju jara wažne. Kóžda kónčina, haj samo kóžda gmejna, ma swój wěsty staw, štož aktiwne serbske žiwjenje nastupa.
Wo mojim dźěle
Über meine Arbeit
Serbšćinu praktisce zeznać a nałožować
Kónčina, w kotrejž skutkuju, je dosć wulka. Saha wot Wulkeje Dubrawy hač do Rakec a Hodźija. Do kóždeje gmejny spytam so najprjedy „zažiwić” a rozhladuju so za ludźimi, kotřiž so za serbskosć zajimuja resp. kiž so hižo za to angažuja. Syć mojich kontaktow je mjeztym chětro rozrostła. Wosebity format, kotryž za trenowanje rěče poskićuju, je „Serbska kuchnja”. Zhromadnje warjo a pječo serbujemy. Tute wotputane wašnje wabi dorosćenych, kotřiž serbšćinu hišće wuknu. Wosebje rjenje je, zo maćernorěčni a wuknjacy Serbja w našej kuchni zhromadnje w horncach měšeja. Tute zarjadowanje poskićuju prawidłownje popołdnju abo wječor. Intensiwnišo, mjenujcy wjacore dny, budu zajimcy serbšćinu bórze w druhim formaće dožiwjeć a nałožować móc. Planuju pućowanja resp. kolesowanje po našej rjanej Łužicy. Wažne dźě je, zo su naše poskitki po wobsahu wabjace a načasne. Potom wobdźělnicy z čim wjetšim wjeselom serbuja.
ke kontaktejProjektowe wjerški
Projekthighlights
Serbska kuchnja za swójby “Plincy kaž wot našeje wowki”, 14.04.2023
Nic jenož w serbskich swójbach su plincy woblubowana jědź za wulkich a małych. Porjadne namazane z butru a cokorom, tak su pola nas najwoblubowaniše. Recepty su jara wšelake runje tak kaž spřihotowanje słódnych plincow.
Při zhromadnym pječenju předstajichu swójby swójske recepty a nazhonita serbska wowka poda jeje wosebitostki k pječenju. Tak pjelnichu so spěšnje někotre talerje a wšitcy móžachu sej na kóncu dobre plincy zesłodźeć dać. A připódla nawuknychu dźěći a dorosćeni hišće tójšto nowych serbskich zapřijećow w kuchni.
Serbska kuchnja “Přihotowanje křińčkow”, 10.05.2023
Za prawy serbski kwas su bytostne křińčki, to su z butry formowane wowcki abo honačiki. Pomjenowanje „křińčka“ poćahuje so na „wužłobjene sudobjo“, potajkim mały drjewjany nopašk ze zarězbowanym mustrom.
Za zhotowjenje křińčkow su poprawom jenož trěbne butra, sól, woda a drjewjane formčki. Kak pak so tajke figury prawje spřihotuja a kotre pozadki nałožk docyła ma, wo tym wobdźělnicy w dźěłarničce srjedu 10.05.2024 zhonichu. Při zhromadnym přihotowanju nazhonichu wobdźělnicy mnoho zajimawostkow a wězo samozrozumliwje serbowachu.
Nalětne pućowanje kołowokoło Njeswačidła, 26.04.2024
Pućować a při tym serbować – to běše pozadk nalětnjeho pućowanja kołowokoło Njeswačanskich hatow. Zhromadnje z Madlenu Mičkec, projektowej koordinatorku přirodoškitneje stacije z Njeswačidła podachu so wobdźělnicy na puć.
Při rjanym słónčnym wjedrje nóžkowaše so 6 km dołhi kołoběh lochko a při wjacorych małkich přestawkach zhonichu wšitcy mnoho zajimaweho z našeje přirody. Wosebje njeznate serbske pomjenowanja wšelakich rostlinow a zwěrjatow wubudźichu zajim. Na kóncu běchu sej wšitcy přezjedni, zo su tajke poskitki rjana přiležnosć swoju serbšćinu nałožować a sej nowy wokabular přiswojić.
Kontakt
Kontakt
Raphaela Wićazowa | Lehmann
motiwatorka za serbsku rěč wokoło Wulkeje Dubrawy, Radworja, Rakec, Njeswačidła, Bóšic a Hodźija
raphaela.wicazowa@domowina.de
035935 169970