Serbski kulturny wječor w Malešan Wódnym mužu Sorbischer Kulturabend mit Tanz im Malschwitzer Wassermann-Wódny muž

„Jako šće wódni mužojo běchu“ rěka kniha njeboho serbskeho spisowaćela Jana Hempla. Z předłohi tuteje knihi nasta mjez lětomaj 1989 a 1990 trikowy film z klankami w němčinje, ale ze serbskej tematiku. Po wjace hač 30 lětach so film „Jako šće wódni mužojo běchu“ prěni raz serbsce předstaja – a to jako prapremjera w Malešecach na žurli hosćenca „Wódny muž“. Ale z tym njeje dosć. Dokelž změjemy na tutym wječoru w Malešecach dwě premjerje! Kniha Jurja Brězana „Powědki wo wodźe – Erzählungen vom Wasser“ so tohorunja prěni raz serbsce předstaja. Dźakowano Serbskemu ludowemu ansamblej a wosebje knjezej Dieterej Kempje směmy so na to wjeselić, zo so tutej dwě premjerje scyła zmóžnitej. Wšak su so dyrbjeli noty za partituru krótkofilma (25 mjeńšin) znowa napisać a wot orchestra znowa zahrać a nahrawać.

Su-li tutej premjerje nimo, přizamknu so reje ze serbskej kapału „Holaski“ z Chrósćic. Zastup wječora je po kategorijach rjadowany: Přińdźeće-li jenož na premjerje filma resp. knižki Jurja Brězana, tak płaćiće 5,00 € (za dźěći 2,50). Chceće-li na reje z „Holaskami“, tak płaći to 10,00 € resp. 8,00 za młodostnych. A jeli chceće sebi cyły wječor lubić dać, tak wučinja to 15,00 € w kombinaciji.

Serbski kulturny wječor organizuje – a to je tohorunja premjera – wozrodźene towarstwo Nadźija! Towarstwo „Nadźija“ je so wjace hač 80 lět po swojim zakazu přez nacionalsocialistow lětsa w měrcu w Malešecach znowa załožiło a ma tuchwilu něhdźe 15 čłonow w starobje wot 17 do 72 lět. Towarstwo bu w lěće 1914 w Rakojdach załožene a ma potajkim 111-lětnu tradiciju, na kotruž chcemy rady nawjazać. Kooperaciski partner wječora je ZARI – syć za serbsku rěč a regionalnu identitu.