Wo serbach w Flensburgu přednošowała Přednošk wo serbach w Flensburgu

Slědźerka projekta ZARI Alena Pawlikec přednošowaše wo Łužiskich Serbach minjenu srjedu 26. awgusta 2026 na 16. lěćnej šuli wo narodnych mjeńšinach slědźerskeho instituta European Centre for Minority Issues (ECMI) w kooperaciji ze załožbu Coppieters Foundation w Flensburgu. Pod hesłom “Europe’s Non-Kin-State Minorities: Profiles and Realities” wěnowaše so něhdźe 23 wobdźělnikow a wobdźělnicow wot 23. do 28. awgusta mjeńšinam bjez maćerneho stata (non kin-state) a jich linguistiskim, socioekonomiskim a politiskim wužadanjam. W přednošku “Upper and Lower Sorbian Communities in Germany: Challenges and Realities” rysowaše Alena Pawlikec wuwiće dźensnišich politiskich strukturow a institucijow w Serbach kaž tež rozdźělnej sociolinguistiskej situaciji hornjo- a delnjoserbšćiny. Wužadanja kaž dale dawanje rěče mjez generacijemi, zdobyće noworěčnikow a wuwiće rěčnych rumow žadaja sej tu mjez druhim lokalnje přiměrjene rewitalizaciske strategije w Hornjej a Delnjej Łužicy.

Jeli maće prašenja na Alenu Pawlikec: tel.: 03591/316 3856 | alena.pawlikec@domowina.de